Stétt

Stéttarstaða og hinseginleiki fléttast víða saman í þeim heimildum sem hér er fjallað um. Stéttarstaða gat haft mjög afgerandi áhrif á hvaða möguleikar stóðu einstaklingum til boða til að lifa hinsegin lífi. Sum þeirra hinsegin rýma sem við höfum rekist á eru stéttbundin, t.d. kvennahreyfingin og listir, að því leyti að aðeins konur úr efstu samfélagslögunum höfðu aðgang að þeim. Sjómennska var, líkt og listir, ekki aðeins starfsstétt heldur einnig bundin við vissar félagslegar stéttir. Borgaraleg yfirstétt bæjanna eða heldri bændur stunduðu til dæmis ekki sjómennsku heldur var vinnumönnum, og stundum vinnukonum, oftast fengið það hlutverk.

Þegar við hugsum um hinseginleika og stéttarstöðu verðum við einnig að hafa í huga að meiri líkur eru á því að vissra stétta sé getið í eftirheimildum en annarra. Einnig er misjafnt eftir stéttum hversu líklegt er að fólk hafi skilið eftir sig frumheimildir. Það er því ekki að undra að þær konur sem hér er fjallað um séu gjarna í efstu stéttalögunum, þeim lögum samfélagsins sem létu eftir sig flestar persónulegar heimildir og voru, öðrum stéttum fremur, viðfangsefni sagnaritara. Við þurfum því að taka með í reikninginn þagnir og eyður í heimildum um hinsegin kynverund kvenna af lægri stéttum.